موضوع: طابور العيش مابينتهيش(خاطرة)بقلمى الأحد 24 أبريل 2011 - 23:52
لقيته مابينتهيش وناس صاحية من النجمة عشان تطول لها لقمة وكل شوية تيجى ناس تقول انا كنت هنا واقفة رحت بس أبص على ولادى سايباهم لوحدهم وعليهم انا خايفة ودى جاية وشايلة على كتفها إبنها وعايزة تمشى قبل العالم الواقفة حرام عليكم ياظلمة ده أنا شايلة على كتفى حمل كبير وجوزى إتوفى وبجرى على يتمى إدونى فرصة أدخل ينوبكوا فية ثواب كتفى إتخلع ياناس من شيلة الواد هى قلوبكوا إتنزعت منها الرحمة ياست ما إحنا كمان واقفين من طلعة النهار وبياع العيش واد بارد وقلبه كله قسوة لا بيرحم صغير ولا بيرحم كبير وبيعبى العيش من جوة الفرن لحبايبه ولصحابه وأكيد بياخد على كدة منهم رشوة ياخرابى الساعة عدت كام؟؟؟؟؟ الساعة عدت ........تسعة......عشرة ده فاضل يادوبك ساعة وتقفل الفرن وأنا لسة ماوصلتش حتى للشباك آه لو يفوتنى رغيف العيش والبيت فاضى مافيهش أى رغيف وإيه راح ناكل ياخلق ياهوووووووووو وهب .....هب ......هب .....هب عدت الساعة وصرخ بياع العيش ياجماعة خلاص العيش خلص مفيش عيش ياخرااااااااااااااااااااااااااابى العيش خلص والفرن هتقفل والكل صاح فيه منك لله ياظالم حسبنا الله ونعم الوكيل ياللى بيكيلوا لنا بالكيل ضاعت الذمم والضماير والقلب شايل منكم شيل بعد ما وقفنا كل دى الساعات ورجلنا وجعتنا وإتعذبنا فى الوقفة سمعنا صوت ......إحتجاجاتنا وفيها آهات يعنى مفيش فيكم فايدة قمنا بثورة عشان ينصلح حالنا لكن برضه لسة فيه قلوب سودا لاينفع فيها غسيل ولا حتى مكوة ربنا على كل ظالم ...فاسد واقف وحاطط فى ودنه سدادة عشان مايسمعشى أى كلام ولا يحس بأى حسرة لو كنتوا من ربنا بتخافوا ماكانش ده بقى حالنا وحسبنا الله ونعم الوكيل هو اللى قادر ينصف المظلوم ويفك كربة كل مؤمن وينصر كل غلبان على المفترين ....الجبابرة وشكرآ لكم
