كل سنه و إنتوا طيبين يا حبيباتى
رمضان جاى على الأبواب إن شاء الله (( اللهم بلًغنا رمضان )) و عايزين نستغل كل دقيقه فيه فى طاعه بإذن الله
و
كل ست بيت بتبقى محتاره ..... نفسها تعمل أحسن أكل و حلويات و مشروبات
لأسرتها و نفسها فى نفس الوقت إنها تقرأ أجزاء عديده من المصحف فى اليوم و
بيبقى صعب التوفيق بين الإثنين
و كمان بيبقى فيه عزومات و أيام بتضيع فى تحضير العزومه
دى
عدة أفكار بتقلل الوقت و الجهد فى المطبخ ... علشان تقدرى تقرأى عدة أجزاء
من المصحف فى اليوم الواحد و يبقى فيكى حيل تصلى صلاة التراويح سواء فى
البيت أو المسجد ..... و فى نفس الوقت تكونى عملتى أحسن أصناف فى أقل وقت و
بأقل جهد بإذن الله
حأحاول أسرد عدة أفكار ببساطه و بسرعه علشان ما تزهقوش
1-
قبل رمضان إكتبى إحتياجات البيت ( أكل - مشروبات -توابل - صابون - كركديه -
تمر هندى -دوم - ملح .... كل حاجه ..كل حاجه ) فى ورقه و إبتدى جمعيها
علشان لا تضطرى تشترى و تنزلى فى رمضان و تضيعى وقت العباده .
2- عمل كميه كبيره من البصل المفروم و تعبئتها فى أكياس و حفظها فى الفريزر.
3- عمل ثوم مفروم و تجميده مفروم فى علبه محكمة الغلق ... و شوية ثوم مفصص لوحدهم يجمدوا برضو .
4-
عمل عصير كميه من الطاطم المعصوره و تعبئتها فى أكياس فى الفريزر ( و إذا
لم تتمكنى من ذلك ممكن تجميد الطماطم كما هى و عند تسييحها حتلاقى قشرتها
إنفصلت عنها ...إنزعيها و إضربيها فى الخلاط بتبقى كأنها طازجه بالظبط )
5- إعملى كميه من اللحم العصاج و جمديه فى الفريزر و يبقى سهل و جاهز وقت الحاجه
6-
عمل كميه من ((للحم العصاج المضاف إليه عصير طماطم و ملعقة صلصه و تبليها و
جمديها ))) بتنفع ( لعدة أصناف .. للمكرونات - المسقعه ....)
7-
إعملى كميه كبيره من ((صلصة الطبيخ : تحمرى البصل فى سمن ثم تحمرى اللحم
حتى يتماسك ثم تضيفى عصير الطماطم و تترك حتى يبقى اللحم نصف سوا ثم تضيفى
الملح و الفلفل )) و تبقى يادوب جاهزه على وضع الخضار فيها و قسميها فى
أكياس كل كيس يقضى طبخه و جمديها (بدون وضع الخضار فيها و لما بتسيح بتبقى
كأنك لسه عاملاها بالظبط )) و بعد ما تسيح وقت الحاجه ضيفى الخضار اللى
إنتى عايزاه عادى خالص .
8- إعملى خلطة المحشى (( البصل و الخضره و
الطاطم و اللحم المعصج و السمن و الملح و الفلفل )) و ممكن تعطيها غلوه على
النار لو عايزه و ممكن لأ... و جمديها للمحشى بدون وضع أرز نهائى ... و لما بتسيح بتبقى كأنك لسه عاملاها بالظبط و بأقول تانى (( بدون وضع الأرز ))) تضعى الأرز قبل عمل المحشى مباشرة .
9-
إشترى دماسة فول ((حجم كبير علشان لا يحدث فوران للفول و هو على النار و
يطفى النار و العياذ بالله )) و تعلمى طريقة تدميس الفول (لو كنتى مش
بتعرفى تدمسيه ( سهل جدا ) )حتوفرى وقت و جهد كبير بوجود الفول المدمس
للسحور فى البيت وقتما تشائين و فننى و نوًعى فى أصناف الفول كل يوم على
السحور.
10- إعملى الزبادى فى البيت ( سهل و الله ) و لا محتاج جهاز
و لا حاجه خالص ... ينفع للسحور طبعا و للسلطات مع الفطار و بعض أصناف
الحلويات ...و يبقى عندك كميه تحت إيديكى إنتى اللى عاملاها .
11- لو عندك إبتداء من دلوقتى شوربه زياده (( عبئيها فى أكياس و جمديها )) و شيليها فى الفريزر تنفع فى شوربة الفطار ( الشوربه صنف ثابت طبعاً كل يوم ) فى رمضان
12- بعض الأصناف كاملة التجهيز إكتشفت إنها لا تتأثر بالتجميد نهائى بشرط إنك تحكمى الإغلاق و من هذه الأصناف :
* صينية جلاش بالجبن أو اللحم
* صوانى الرقاق
* الكنالونى كاملا و ممكن تعملى عجينة الكريب و تحتفظى بالأقراص هى اللى تجمديها و لما تسيح تبقى إحشيها عادى خالص
* خرشوف بالبشميل
* مسقعه بالبشميل
* الحمام المحشى فريك ( يبقى كامل النضج لكن لا تحمريه إلا لما يسيح و قبل التقديم تسخنيه و تحمريه )الحمام المحشى أرز لأ...لأ...لأ ...الأرز بيعجن ... لكن الفريك مش بيعجن نهائى .
* المشروبات مثل الكركديه و التمر هندى و الدوم
13- إعملى عصير المشمش فى البيت و جمديه فى الفريزر بيبقى أحلى من قمر الدين
14-
لو عندك عزومه (( ممكن تعزمى الناس فى الوقت اللى إنتى عندك عذر شرعى فيه و
فاطره مش صايمه )) علشان تبقى ما ضيعتيش وقت العباده و كمان علشان تعرفى
تدوقى و تظبطى طعم الأكل كويس .
15- ما ننساش طوووووول ما إحنا
بنطبخ فى المطبخ نشغل قرآن (( لأن أجر السامع كأجر القارىء)) سوره محببه
إلى قلبك من قارئك المفضل مثلاً..تخيلى بقى بتطبخى ...و كمان بتاخدى ثواب
الطبيخ و ثواب القرآن ...و كمان الأكل بيطلع أحلى و أطعم ده حقيقى مش هزار .
دى خلاصة تجاربى و من معاميق أفكارى
و هى دى الأفكار اللى جاءت على بالى دلوقتى و يا ريت لو أى أخت عندها فكره تضيفها كمان علشان الكل يستفيد
و كل سنه و إنتوا طيبين
منقووول للفائدة جزاي الله كاتبة الموضوع خير الجزاء
الموضوع : افكار توفر وقتك وجهدك فى رمضان المصدر :منتديات تقى الإسلامية الكاتب: مسلمة ولله الحمد توقيع العضو/ه:مسلمة ولله الحمد |
|
