السلام عليكم ورحمة الله وبركاته
مش هنبوس إيديكم
ولا نتحايل عليكم
ده واجبكم وشغلكم
يلا إيدنا فى إيديكم
ياظباط الشرطة أمانة
تنزلوا الشارع معانا
البلد بيكم وبينا
راح تبقى ف إيدين أمينة
ميت سريقة وميت حريقة
ميت عصابة ف قلب غابة
لو بعتونا هنشتريكم
لجل بلدنا الصعب يهون
هى دى والله الحقيقة
إحنا منكم وإنتوا منا
إن كنتوا ظباط ولا أمنا
كلنا إخوة ومصريين
مايفرقنا عدو ولا دين
ممكن أكون زوجة ظابط شرطة
ممكن أكون أم لواء شرطة
ممكن أكون أخت عقيد شرطة
إبن عمى أو إبن خالى عسكرى شرطة
قصدى أقول إننا واحد هنا
أهل وقرايب
حبايب عايشين
لموا معانا البلطجية
اللى راعبين المواطن
كدة تبقوا مية ....مية
وإحترامكم جوانا ساكن
فيكم الشرفا كتير
زى أى مهنة تانية
م الصغير للكبير
زى حال الدنيا
يوم عن يوم
يحصل تغيير
وآدى ثورتنا الفتية
فجرت طاقات ثرية
عشنا وعاشت الحرية
بس لازم كل واحد
يحترم تحقيق الشرعية
لا لكل إيد تخرب
لا لكل عقل يدمر
إنزلوا يلا ف شارعنا
نفسنا تهدى نفوسنا
ده إنتوا حصن أمان
إحنا وإنتوا وجيشنا
يلا نشارك فى البنيان
نبنى نهضتنا بإيدينا
نزرع الخضرة فى وادينا
شرطة....جيش.....شعب
كلنا يد واحدة
كلمة واحدة
قلب واحد
حبنا مالى جوارحنا
مصر بلدنا
تحيا بينا
لجل ماتسير السفينة
وعلم بلادنا يرفرف
الله أكبر
بنحبك يامصر
الموضوع : مش هنبوس إيديكم المصدر :منتديات تقى الإسلامية الكاتب: سنابل
