موضوع: كنت نايم فى أمان السبت 23 أبريل 2011 - 4:28
كنت نايم فى أمان وصحيت على صوت الأذان قمت صليت ركعتين لله رب العالمين ودعيت وقلت يارب إحمى بلدنا من شر الحاقدين وإحمى شبابنا الصاعد الواعد اللى فتحوا باب الأمل وخلوا نور الفجر يدخل كل بيت
فطرت مع العيلة وكانت صحبة جميلة وبعد كام ساعة رحت على صلاة الجماعة دخلت بيمينى المسجد والكل كان بيركع ويسجد موحدين لله
وكانت خطبة الجمعة وكل الناس سامعة لا للإرهاب لا للتخريب نعم للتغيير نعم للدستور بس بالعقل والحكمة وعقول بتشع النور
عايزين إصلاح صحيح وبدل الحزن تفاريح وبدال الظلم عدل وليل أمان وسلام ونهار عمل وكفاح ولسان بذكر الله قرآن ...وكمان تسابيح
عهد الفساد إنتهى وبكرة فاتح لنا أبوابه يشهد على جهادنا ويحيى نبض شبابه حريتنا من كرامتنا ونور يكسر ضبابه
بأمر مين ياشعب؟ أعمال سلب ونهب وخوف لناس طيبة وكلامها من القلب بأمر مين ياناس ؟ العدل يوم ينداس ويسود فساد للعباد وعند وتحدى وضرب
كلمتنا أهى قلناها للدنيا سمعناها وهييجى يوم النصر ونشوف إبتسامة مصر رمز الحب والأمان وحنان يضم الأهل وراية بيضا مرفوعة تحيا جمهورية مصر العربية حرية....ديموقراطية قومية.....عربية وكلمتها مسموعة
